توركیا وەك تێكدەر لە كورد دەڕوانێت، لای تورك كورد هۆكاری تێكدانی ژێرخانی توركیایە و وێرانكەری ژیانی ئابووریەتی، بۆیە هەرشتێك پەیوەندی هەبێت بە چارەنووسی مافەكانی كورد لە روانینی ناسیونالیزمی توركی رەشبینانە مامەلەی لەگەڵیدا دەكرێت، لەبەرئەوەی بە هەڕەشەی دەزانن بۆسەر ئاسایشی نەتەوەیی تورك، پێیان وایە ئازادی كوردان دەبێتە مەترسی راستەقینە بۆسەر سەقامگیری لە توركیا .
توركیا سەرسەختترین نەیاری مافەكانی كورد، لەهەرشوێنێكی دونیا بێت، لەدەستوری توركیا هیچ دەقێكی تێدا نیە، دەربارەی مافەكانی كورد یا بەندێكی دەستوری نیە باس لەهەبوونی نەتەوەی تر بكات، جگە لە نەتەوەی تورك، بەڵكو میللەتی توركیا وەك یەك میللەت ئەژمار دەكەن و، كاریان لەسەر ئەوە كردوە كە دەولەتی توركیا لە هیچ جۆرە نەتەوە و ئایین یا ئاینزایەك پێك نەهاتووە، بەڵكو لەسەر بنەمای هاوڵاتیبوون و دڵسۆزی بوون بۆ وڵات دامەزراوە.
لەناو ئەو وڵاتانەی كوردستانیان بەسەردا بەشكراوە، توركیا لەهەموویان زیاتر نەیار و دژی مافەكانی كوردە، لەبەرئەوەی ئایدۆلۆژیای توركی لەسەر گریمانەیەك دامەزراوە كە پێیوایە (كورد لەسەر زەوی بوونی نییە)، ناوەندەكانی بڕیاری سیاسی لەتوركیا بەدرێژایی زیاتر لە حەفتا ساڵ كاریان بۆ دووبارەكردنەوە و چەسپاندنی ئەو بۆچوونە كرد، تا ئەوەی لای توركەكان بوتە راستییەك كە ناكرێت بەدرۆبخرێتەوە .
لای تورك پرسی كورد لە توركیا كێشەی كۆمەڵێك یاخی و خوێنڕێژە، كە لەژێر چەتری پارتێكدا كۆبونەتەوە، گروپێكن توندوتیژی وتیرۆریان كردووەتە ستراتیژیی خۆیان، بۆیە پێیان وایە چارەسەری ئەم كێشەیە بە ریشەكێشكردنی رەگەكانی تیرۆر‌و كوشتنی چەتەكان ، بە هێزی سەربازی دەتوانن كۆتاییان پێبهێنن .
ئێستا له كوردستان شتێك نیە بەناوی ئاشتی و پرۆسەی چارەسەری، دوای هەڵبژاردنەكان پرۆسەی كاولكاری به‌رێوه ده‌چێت، زولمێكی گەورە له سه‌ر گه‌لی كورد هەیە، لەژێر پەردەی دیموكراتی و كرانەوە، سووكایه‌تی كردن و هێرشه‌كردنە لە سه‌ر ئیراده‌ی ئازادیخوازانەی میللەتێك .
لەئێستادا شاره‌كانی ئامەد باتمان، شرناخ، وان و ئیدر. . . هه‌ڵمه‌تی گرتن و توقاندن بوونی هەیە، ئەكه‌په ده‌یه‌وێ زیاتر لە ئامانجێك بپێكێ، ئاشكرایه به گرتنه‌به‌ری توندوتیژی و گوشاری زۆر لە ئامانجێكی سیاسی زیاتر به‌ده‌ست دەخات، هێرشه‌كانی ئه‌م دواییه‌ی ئەكه‌په رێبازێكی دیكه‌ی چەواشەكارانە پێشان ده‌دات، ئه‌و هاولاتیە سڤیلانه‌ی كە دەگیرێن یا دەكوژرێن به ئه‌ندامێتی په‌كه‌كه تاوانبارده‌كرێن.
به‌بیانوى ئه‌وه‌ى هێزه‌كانى تورك بۆ چه‌ك و چالاكوانان ئه‌گه‌ڕێن بەهۆی شه‌ڕوپێكدادان و قه‌ده‌غه‌كردنى هاتوچۆی لە زۆربه‌ى شاره‌كانى باكورى كوردستان، خۆیان ووتەنی ئه‌یانه‌وێت (تیرۆرى كوردى) بنبڕبكه‌ن، دەست لە هیچ كارێكی دڕندانە ناپارێزن، له‌م هێرشانە شه‌هیدو برینداری مەدەنی لە پیرو پەككەوتە دەكرێنە ئامانج، ئەمە جگە لەوەی سیاسەتێكە بۆ ملكەچی كردنی كوردان، بۆ ئیرادەیەكی توركگەرایی ، نەخشەیەكی تازەیە بۆ گەیاندنی زه‌ره‌رو زیانی گەورە لەهەمانكاتدا هەولێكە بۆ گۆڕینی جوگرافیا لەرێگای وئاوارەبوون و ده‌ربه‌ده‌ركردنی خەڵك و چۆلكردنی ناوچەكە .
ئەوەی زیاتر جێگای سەرنج و تێڕامانە ئێمە لە كوردستانی باشوور، كاتێ ئەنفال دەكراین، گلەیمان لە دەولەتانی ئیسلامی و دنیای عەرەب و جیهان دەكرد، كە بێدەنگ دەبوون و چاویان لە ئاستی ئەو هەموو تاوانە كوێر دەكرد ؟.
ئێستا كەنالەكانەی راگەیاندنی لای خۆمان زۆر كەمیان لەبەرانبەر ئەو جینۆسایدە دێنە دەنگ هەندێكیان كەرولالن، ئەی ئێستا كاتی ئەوە نییە هەڵوێستی توندمان بەرامبەر سیاسەتی كوردكوژی تورك هەبێ، تا بتوانین میدیاكانمان لەخزمەتی رومالكردنی ئەو تاوانانە بێت كە رۆژانە دژی مێللەتەكەمان لەباكورئەنجام دەدرێت ، بۆ ئەوەی رای گشتی جیهانی لەو تاوانە بهنینە سەرخەت ؟ .
كار لەسەر ئەوە بكەین رای گشتی لە ئه‌مریكا لەچەقبەستویدا دەربچێ ، واز له‌سیاسه‌تى دووفاقی بهێنێ، چیتر بێدەنگی هەڵنەبژێرێ لەئاست ئەو پێشێلكاریانەی دەكرێت لە تێكدان و كاولكاری و كۆمەڵ كوژی بۆ قڕكردنی گەلی بەشخوراو وئازادیخوازی كورد لەباكور، لەكاتێكدا كورد لەبەرەی شەڕی دژ بەتیرۆرە، لە هەرسێ ولاتی سوریا و عێراق و تۆركیا، زۆرترین كورد لەو بەرە فرەوانەی شەڕ بریندارو شەهید دەكرێن .